Нацыянальны банк Беларусі з 1 траўня пастанавіў павялічыць значэнні разліковых велічынь стандартнай рызыкі (РВСР) – гэта адбудзецца ўпершыню за апошнія тры месяцы. Гэта адсоткавая столь для банкаўскіх крэдытаў, у першую чаргу на нерухомасць.
Як паведамляецца, Нацбанк павысіў значэнні разліковых велічынь стандартнай рызыкі, якія будуць дзейнічаць у траўні гэтага года.
Для новых крэдытаў у беларускіх рублях, без уліку льготных, паказнік складае:
- для юрыдычных асобаў – 11,98 % гадавых (цяпер 16,63 %);
- для фізічных асобаў – 17, 22 % гадавых (цяпер 11,61 %).
Бягучыя значэнні РВСР заставаліся нязменнымі з лютага.
Карэктаванне значэнняў РВСР уплывае на рост або скарачэнне адсоткаў за карыстанне крэдытнымі сродкамі для бізнесу і простых беларусаў у большасці камерцыйных банкаў нашай краіны.
РВСР вызначае верхнія межы для ставак крэдытаў: вышэйшыя адсоткі не забароненыя, але пры іх выкарыстанні для банкаў выстаўляюцца дадатковыя патрабаванні наконт капіталу і фармавання рэзерваў.
Яшчэ адзін паказнік, на які фінустановы арыентуюцца пры выстаўленні адсоткавых ставак пры пазыках, – стаўка рэфінансавання. Цяпер яна складае 9,5 % гадавых. Нацбанк прагназуе, што стаўка рэфінансавання ў сярэднім за 2024 год будзе на ўзроўні 9–9,5 % гадавых.
Нагадаем, у Беларусі працягваецца крэдытны «хапун». Ён вельмі напружвае Нацбанк, бо ў некаторых пазычальнікаў узнікаюць праблемы з пагашэннем крэдытаў ад празмернага пазыковага цяжару.
Ася Саковіч belsat.eu
